Oʻzbekiston Qahramoni, Xalq shoiri Abdulla Oripov xotirasiga
“Shoir oʻldi” demang – yashaydi shoir,
Bezavol, shirali qoʻshiqlarida.
“Shoir oʻldi” demang – yashnaydi shoir
Birinchi muhabbat koʻshklarida.
“Shoir oʻldi” demang – yozar qasdma-qasd,
Uni yengolmaydi yillar armoni.
“Shoir oʻldi” demang – mitti yulduzmas,
Charogʻon yulduzday porlar har oni.
“Shoir oʻldi” demang – to bordir oʻzbek,
Tilida, dilida yangraydi sasi.
“Shoir oʻldi” demang – quyoshli soʻzdek
Muzlarni eritgay oʻtligʻ nafasi.
“Shoir oʻldi” demang – boʻy berar har yil
Dehqonning koʻklamgi, kuzgi oʻyida.
“Shoir oʻldi” demang – davrada u, dil
Piyoladay toʻlsa elning toʻyida.
“Shoir oʻldi” demang – visol chogʻlari
Sirlashgan qalblarning shavqiga sherik.
“Shoir oʻldi” demang – hijron dogʻlarin
Davolab yurguvchi tabib u – tirik!
“Shoir oʻldi” demang – urar yuragi
Yurtning bosh, ulugʻvor taronasida.
“Shoir oʻldi” demang – koʻchib yuradi
Millatning sheʼrsevar har onasida…
“Shoir oʻldi” demang – uygʻoq, sarosar
Koʻngildan jannatga yoʻl soldi shoir.
“Shoir oʻldi” demang – doʻzax, arosat
Yukini yelkalab, yuksaldi shoir.
“Shoir oʻldi” demang – shikasta rozi
Siniqdil koʻzida silqir yosh boʻlib.
“Shoir oʻldi” demang – sobit ovozi
Hasadgoʻy koʻksiga botar tosh boʻlib.
“Shoir oʻldi” demang – bir umr mayda
Gʻiybatlardan bezib, choʻchib oʻtdi u.
“Shoir oʻldi” demang – chorlashgan paytda
Ulugʻlar yoniga koʻchib oʻtdi u.
“Shoir oʻldi” demang – Baqo qasriga
Muhtasham, qutlugʻ bir yalov – tugʻ ildi.
“Shoir oʻldi” demang! Shoir, aslida,
Oʻlmaydigan boʻlib qayta tugʻildi!
Nodir Jonuzoq
2016 yil 7 noyabr
