Qizim

0
722
marta ko‘rilgan.

Tug‘ildingu bag‘rimiz to‘ldi,

Yuzimiz ham baxtimiz kuldi,

Olam birdan charog‘on bo‘ldi,

Jonim – qizim, jahonim – qizim.

 

O‘z tilingda so‘zlab, chuldirab,

Kulgularing bilan kuldirib,

G‘amlarimiz ortda qoldirib,

Baxtlar sochding, biyronim – qizim.

 

Nimalarga tikilib qolding,

Nega buncha o‘ylarga tolding,

Kulding, so‘ngra qovog‘ing solding,

Bu dunyoga hayronim – qizim.

 

O‘zim shodman seni erkalab,

Mayingina sochlaring silab.

Manglayingga asta bosdim lab,

Jannat bo‘yli rayhonim – qizim.

 

Balolardan asrasin Egam,

Ey bugunim, ey mening ertam.

Ko‘zim nuri, qarog‘im, erkam,

Jonim – qizim, jahonim – qizim.

 

Orif Tolib

 

2016

MULOHAZA BILDIRISH

Mulohaza kiritilmadi!
Ismi sharifingizni kiriting.