“Ayting, bu sizmasmi, turnalar?”

0
170
marta koʻrilgan.

Qizlarni toʻsatdan quchdi shamollar,

Oq bulutlar uzra uchdi roʻmollar –

Ayting, bu sizmasmi, turnalar?

 

Meni tuni boʻyi oʻrtagan alam

Sizib kirdi kunning koʻzlariga ham –

Ayting, bu sizmasmi, turnalar?

 

Nuryuzli ayollar yozdilar qanot,

Ularni bagʻriga oldi xotirot –

Ayting, bu sizmasmi, turnalar?

 

Uchburchak konvertlar qatida yuzlab

Maktublarim uchdi Kavkazni koʻzlab –

Ayting, bu sizmasmi, turnalar?

 

Kuz kunlari tinmay toʻzgʻitib xazon,

Boshim uzra rosa soldilar suron –

Ayting, bu sizmasmi, turnalar?

 

Rasul HAMZATOV

 

Yuragimni tirnab oʻtdi satrlar,

Soʻng qogʻoz bagʻriga botdi satrlar –

Ayting, bu sizmasmi, turnalar?

 

Togʻ. Koʻklarga tutash uy tomida jim

Turibman va boshim uzra betinim

Nogʻora qoqyapsiz, ey siz, turnalar!

 

Rus tilidan
Orif Tolib

tarjimasi

Ruscha tarjimani oʻqish

MULOHAZA BILDIRISH

Mulohaza kiritilmadi!
Ismi sharifingizni kiriting.