Kapalakning zaif qanotlari

0
137
marta ko‘rilgan.

Tokcha chetida bir pilla qolib ketgan edi. Unda kichkina tirqish paydo bo‘ldi. Uy egasining ko‘zi to‘satdan shu pillaga tushib qoldi va kapalak uni qanday qilib yorib chiqishga urinayotganini kuzata boshladi. Oradan ancha vaqt o‘tdi. Kapalak urinishdan to‘xtaganga o‘xshar, tirqishning kattaligi esa o‘zgarmaganday edi. Go‘yo u qo‘lidan kelgan hamma ishni qilganu bu yog‘iga madori umuman qolmaganday edi.

Odam unga yordam berishga qaror qildi. Qalamtaroshini oldi-da, pillani kesib, teshikni kattaytirdi. Kapalak shu zahoti tashqariga chiqdi. Lekin uning tanasi judayam kuchsiz va nimjon edi, nozik qanotlari zo‘rg‘a qimirlardi.

Uy egasi kuzatishda davom etdi. Kapalak hozir qanotlarini yoyadi-da, uchib ketadi, deb o‘yladi u. Ammo hech bir o‘zgarish bo‘lmadi!

Kapalak umrining qolgan qismini o‘limsangi tanasi va ochilmagan qanotlarini yerga sudrab o‘tkazdi. Ucha olmadi.

Nega bunday bo‘ldi? Chunki unga yordam bermoqchi bo‘lgan odam pillaning kichkina tirqishidan chiqish uchun kapalakka qo‘shimcha vaqt va kuch kerakligini anglamadi. Tanasidan yetib kelgan suyuqlik kapalakning qanotlarini harakatga keltirar, u shundagina ucha olardi. Hayot uning oldiga ana shu qobiqni yorib chiqish mashaqqatini qo‘ygan, evaziga esa o‘sish-rivojlanishni va’da etgan edi.

Jismoniy-ma’naviy jihatdan bir pog‘ona yuqorilash, tajriba orttirib, o‘z yo‘limizni topish uchun ba’zida qiyinchiliklarga ehtiyoj sezamiz. Ularsiz biz g‘o‘r va mo‘rt bo‘lib qolamiz. Agar ularni sabr-bardosh, matonat bilan yengmasak, o‘z kuchimizga, Xudo bergan qobiliyatimizga ishonmasak, hech qachon chiniqa olmaymiz. Imkoniyatlarimiz, iqtidorimiz kapalakning zaif qanotlari kabi foydasiz bo‘lib qoladi.

 

Orif Tolib

 

“Yoshlik” jurnalining 2017 yil 7-sonida chop etilgan.

MULOHAZA BILDIRISH

Mulohaza kiritilmadi!
Ismi sharifingizni kiriting.