Mo‘jizaning bahosi

2
654
marta ko‘rilgan.

Tessi o‘n yoshlardagi istarali bir qizcha. U bir kuni ota-onasi ukasi haqida gaplashayotganini eshitib qoldi. Qizcha ukasi og‘ir kasal ekanini va davotish uchun ota-onasida pul yo‘qligini bildi. Oila yaqinda boshqa uyga ko‘chib o‘tgan, shu sabab bir paytda uyga va muolajaga to‘lov qilishning iloji yo‘q edi. Teddini kuchli malakaga ega va shu bilan birga xizmati qimmat jarrohgina davolashi mumkin edi.

Tessining onasi yig‘lar, otasi esa umidsiz bir ohangda gapirardi:

– Teddini hozir faqat mo‘jizagina qutqarib qolishi mumkin.

Bu gapni eshitib, qizcha xonasiga yugurib kirdi, g‘aladondagi qutichasini ochdi. Uning butun boyligi shu idishga jamlangan edi. Tangalarini gilamga to‘kdi-da, sanay boshladi. Adashmaslik uchun uch marta sanadi. So‘ng pullarini qutichaga solib, bor kuchi bilan dorixonaga qarab yugurdi. Tessi dorichi unga vaqt ajratishini jimgina kutib turdi. Biroq oq xalatli kishi boshqa bir kishi bilan qizg‘in suhbatlashar, xona chetidagi o‘n yashar qizchaga qarab ham qo‘ymasdi. Xiyla vaqt o‘tdi. Qizcha nima qilarini bilmay, oyoqlarini bir-biriga tap-tap etkazib urdi. Biroq foydasiz. So‘ng qattiq-qattiq yo‘taldi. Ammo bu ham naf bermadi. Nihoyat u bitta tangani olib, oynani chertdi. Nihoyat dorichi unga qaradi!

– Nima kerak senga? – dedi u asabiylashib. – Ko‘rmayapsanmi, ukam bilan gaplashyapman. Atay Chikagodan kelgan, nechchi yildan beri ko‘rishmagan edim.

– Men ham ukamni deb bu yerga keldim, – dedi Tessi ovozi titrab. – U judayam og‘ir kasal… Men unga mo‘jiza sotib olmoqchiydim.

– Uzr, nima deding?

– Ukamning ismi Ted, uning boshida bitta yomon narsa o‘syapti ekan. Dadam: “Uni faqat mo‘jiza qutqarishi mumkin”, deb aytdi. O‘sha mo‘jiza necha pul turadi?

– Qizalog‘im, biz mo‘jiza sotmaymiz. Kechirasan, senga yordam berolmayman, – dedi dorichi.

– Pulim bor, agar kam bo‘lsa, yana opkelaman. Qanchaligini aytavering.

Dorichining po‘rim kiyingan ukasi cho‘nqayib o‘tirdi-da, qizchani yoniga chaqirdi:

– Kel-chi, qizim, ukangga qanaqa mo‘jiza kerak?

– Bilmadim, – dedi Tessi yig‘lamsirab. – Men faqat ukam kasalligini, uni operatsiya qilish kerakligini bilaman. Oyim shunday dedi. Lekin dadam unga pul to‘lolmaydi. Shuning uchun o‘zimning pulimni ishlatishga qaror qildim.

– Qancha puling bor? – deb so‘radi chikagolik kishi.

– Bir dollaru o‘n bir sent, – deb g‘o‘ldiradi qizcha. – Bor pulim – shu. Bu kam bo‘lsa, yana opkelaman.

Chikagolik kishi tangalarni oldi-da, qizchaning qo‘lidan tutdi. Uyiga olib borishini so‘radi:

– Hozir uylaringga boramiz. Ota-onangni, ukangni ko‘rishimiz kerak. O‘shanda unga qanaqa mo‘jiza kerakligini aniqlayman.

Bu po‘rim kiyimli kishi neyroxirurgiya sohasida dovruq qozongan taniqli jarroh Karlton Armstrong edi. U jarrohlik amaliyotini mutloq tekinga qildi va Teddi tez orada uyiga soppa-sog‘ bo‘lib qaytdi. Ota-ona o‘zida yo‘q xursand, biri olib-biri qo‘yib do‘xtirni maqtar, uni yo‘liqtirgani uchun Xudoga shukrlar aytardi.

– Bu do‘xtir haqiqiy mo‘jiza bo‘ldi, g‘oyibdan keldi, – deb shivirlardi ona, – Bilmadim, bunaqa operatsiya necha pul turarkan…

Tessining yuzlariga tabassum yugurdi. U mo‘jizaning bahosi qanchaligini juda yaxshi bilardi… Bir dollaru o‘n bir sent va o‘n yashar qizaloqning samimiy ishonchi.

 

Orif Tolib

tayyorladi.

 

“Ma’rifat” gazetasining 2017 yil 7 iyun sonida chop etilgan.

2 Mulohaza

  1. Assalomu alaykum, sayt ijodkorlari! Saytga joylagan maqola va materiallaringizni o’qib, ochig’i, dilim yayraydi. Men “Salomatlik sirlari” gazetasining bosh muharririman. Ushbu materiallardan gazetamiz sahifalarini boyitishni juda istardim. Shu xususda kim bilan bog’lansam bo’ladi. Hurmat bilan Lobar Qandaxorova

MULOHAZA BILDIRISH

Mulohaza kiritilmadi!
Ismi sharifingizni kiriting.