Pahlavon Mahmud. Ruboiylar

0
12976
marta koʻrilgan.

***

Oʻz nafsingga boʻlgin amir, shunda mardsan,

Oʻzgalarga boʻlma haqir, shunda mardsan,

Yiqilganni tepib oʻtish mardlik emas,

Aftodaga boʻlsang dastgir, shunda mardsan.

 

***

Uch yuz Qoʻhi Qofni kelida tuymoq,

Dil qonidan bermoq falakka boʻyoq

Yoinki bir asr zindonda yotmoq

Nodon suhbatidan koʻra yaxshiroq.

 

***

Borma aytmaganning dasturxoniga,

Qoʻl uzatsang, qadring tushar, noniga,

Qoʻshma oʻzgalarning barra kabobin

Qotgan nonu sovuq suving soniga.

***

Koʻzgumga berardim kechqurun sayqal,

Boqdim unga tiniq boʻlgan bir mahal,

Shuncha koʻp koʻrindi oʻz aybimki, men

Oʻzgalar aybini unutdim tugal.

 

***

Dagʻal dili doim ezilgan boʻlur,

Talab yoʻli unga toʻsilgan boʻlur,

Yomon-yaxshi bilan kim kelisholsa,

Dili shodu gʻamdan qutulgan boʻlur.

 

***

Ey dil, shohi toʻnni qilmagil havas,

Eski kiymoqlikni ham etmagil bas,

Yengil oʻtsin desang oʻz kuningni sen,

Qaram qilma oʻzni birovga abas.

 

Toʻxtasin Jalolov va Munirxon Muinzoda tarjimalari

 

Manba: irfon.uz – “Irfon” taqvimi sayti.

MULOHAZA BILDIRISH

Mulohaza kiritilmadi!
Ismi sharifingizni kiriting.