Isitmalab qolsam, ogʻrisam ozroq
Yo ishim yurmasa – toraysa olam,
Onam xavotirda qilar qoʻngʻiroq:
“Tushimga kiribsan, tinchmisan, bolam?”
Shukur, yaxshi, deyman, hammasi aʼlo,
Yuribman – ishim besh, oʻzim salomat.
Onam taskin topar va qilar duo,
Tilaydi ofiyat, omonlik, omad.
Doʻstlar, barchamizga yor boʻlsin tole,
Baxtdan yorugʻ boʻlsin xonalarimiz.
Tashvish, xavotirga tushmasin aslo,
Yaxshi tushlar koʻrsin onalarimiz.
Orif Tolib
2016
