Sunbul arab tilidan kirgan, asliyatda boshoq maʼnosini anglatadi. Oʻzbek tilida piyozgullilar oilasiga mansub, lola bargiga oʻxshash uzun bargli oʻtsimon manzarali oʻsimlik va uning gʻuj boʻlib ochiladigan xushbuy, chiroyli gulini bildiradi:
Sen chindan ham goʻzalsan,
Lablaring ol, qirmizi…
Sochlaringga sunbul band,
Koʻzlaring – tong yulduzi.
A. Oripov, Yillar armoni.
Suv sunbul(i) esa boshqa oʻsimlikni anglatadi. U sochdek uzun-uzun poyali va juda nozik bargli paporotnikdir. Adabiyotda ayollarning sochi sunbulga oʻxshatilganda ana shu suv sunbuli nazarda tutiladi.
Suv sunbulining bir necha turlari bor. U tuvakka ekilib, uy sharoitida ham yetishtirilishi mumkin.
Eʼtibor bergan boʻlsangiz, yuqoridagi sheʼrda soch sunbulga oʻxshatilmayapti, sochga sunbul guli qadalgani haqida gap ketyapti. U yerda sunbul soʻzi gulni anglatyapti.
Sumbul soʻzi sunbulning soʻzlashuv tilidagi variantidir. U lugʻatlarga kirgan va xalq tilida, badiiy tilda keng qoʻllanadi:
Shoʻr yerda sumbul unmas.
Maqol.
Sumbul soch iborasi sunbul kabi uzun va chiroyli soch maʼnosini ifodalaydi. Bu ibora sochni suvda oʻsadigan sunbulga, paporotnik oʻsimligiga oʻxshatish natijasida yasalgan:
Sumbul sochlari taqimiga tushgan goʻzal bir qiz.
📌 Demak:
Sunbul, sumbul ✅
Orif Tolib
