Boyaqish va boyoqish

Koʻpchiligimiz boyaqish shaklini qoʻllaymiz va shu sababli ana shu variant toʻgʻri deb oʻylaymiz. Aslida toʻgʻrisi – boyoqish.

Boyoqish soʻzi achinish uygʻotuvchi holatli, bechora, shoʻrlik maʼnolarini anglatadi.

 

– Otang boyoqish charchab, boʻlganicha boʻldi, – dedi ona.

P. Tursun, Oʻqituvchi.

 

Boyoqish koʻp yaxshi odam edi; insofli, hamiyatli edi.

Oybek, Tanlangan asarlar.

 

Boyaqish soʻzini taniqli adiblar ham ishlatgan, u izohli lugʻatga ham kirgan. Lekin soʻzning izohida uning toʻgʻri varianti boyoqish ekani koʻrsatib oʻtilgan. Imlo lugʻatidan esa boyaqishga joy topilmagan. Shularga asoslanib, hozircha soʻzning boyoqish variantigina toʻgʻri deya olamiz.

Men boyaqishni ham boyoqish soʻzining variantdoshi sifatida lugʻatlarga kiritish, uni ham toʻgʻri deb hisoblash tarafdoriman. Bir soʻzning turli talaffuz variantlari lugʻatlardan joy olgani tajribada bor holat.

 

Orif Tolib