Chex xalq maqollari va matallaridan

Chexlar – slavyan oilasiga mansub xalq. Chexiyaning asosiy aholisi. AQSH, Kanada, Germaniya, Isroil, Argentina, Buyuk Britaniya, Avstriya va boshqa mamlakatlarda ham yashaydi. Chex tilida soʻzlashadi. Umumiy adadi – 10 milliondan ortiq.

 

• Agar ahmoqlik ham kasallik boʻlganida, sen kechasi bilan dodlab chiqarding.
• Gʻazab ertaga qoldirish mumkin boʻlgan yagona narsadir.
• Yogʻimiz bor, lekin u mushuklar uchun emas.
• Itni urmoqchi boʻlgan odam hamisha tayoq topadi.
• Koʻp narsani xohlaydigan kishiga koʻp narsa yetishmaydi.
• Maqtov ortidan quvma, lekin bor kuching bilan maqtaladigan darajada ish qil.
• Nifoq bor uyda oltin goʻngga teng.
• Ogʻizdan chiqqan soʻzga ikkita otda quvib ham yetolmaysan.
• Pivoxoʻr tarvuzga oʻxshaydi – qorni kattalashadi, bandi quriydi.
• Tejalgan pul ishlab topilganidan kam emas.
• Toʻq ochga ishonmaydi.
• Haqiqat koʻzga kiradi, quloqni yirtadi.
• Har bir tulki oʻz dumini maqtaydi.
• “Hech narsa qilmaydi”ni yuzga koʻpaytirsang, hoʻkizni oʻldirishi mumkin.
• Hech qachon bundan-da yomonroq boʻlishi mumkin boʻlmagan darajada yomon boʻlmaydi.
• Shoshib uylansang, shoshmasdan afsuslanasan.
• Eng toʻgʻri soat – oshqozon.
• Er uyiga pul olib kelar ekan, xotini uni erkalatishda davom etadi.
• Yangi til oʻrgansang, yangi qalbga ega boʻlasan.

 

Orif Tolib tarjimasi