Dunyo xalqlari xazinasidan 50 javohir

Tafakkuringizni yuksaltiradigan hikmatlar

 

1. Atala ichdi-yu, tomogʻiga suyak tiqildi. (Afgʻon maqoli)
2. Birovning uyi yondi, birov oʻsha olovda kalla-pocha pishirdi. (Kurd maqoli)
3. Bolaning qoʻliga kirgan zirapcha onaning yuragiga qadaladi. (Mordva maqoli)
4. Boshqalar pul ishlasa – yuragimga azob, oʻzim ishlasam – belimga. (Gruzin maqoli)
5. Bu gaplaringga ogʻzing muzlab qolmayaptimi? (Veps maqoli)
6. Dam olgan paytim zanglayman. (Olmon maqoli)
7. Dunyoda faqat bitta yomon ayol bor: har bir erkak aynan unga roʻpara boʻldim deb oʻylaydi. (Shved maqoli)
8. Eng katta togʻ – uyingning ostonasi. (Sloven maqoli)
9. Gʻiybat koʻmirga oʻxshaydi: kuydirmasa ham, qorasi yuqadi. (Rus maqoli)
10. Goʻshtni tuz saqlar, tuzning oʻzi aynisa, uni nima saqlar? (Abazin maqoli)
11. Haqiqatgoʻyning bir oyogʻi uzangida, oti esa ostonada shay tursin. (Arman maqoli)
12. Har qanday ortiqcha narsa zarar beradi. (Lotin maqoli)
13. Hayot raqs emas – orqaga yurolmaysan. (Zulus maqoli)
14. Javob berishga shoshilgan sekin oʻylaydi. (Arab maqoli)
15. Kirlangan vijdon bir paytning oʻzida ham daʼvogar, ham qozi, ham guvoh, ham jalloddir. (Niderland maqoli)
16. Loviyani quritadigan qurt uning ichida boʻladi. (Kongo maqoli)
17. Ming botmonli yoydan sichqon otilmaydi. (Yapon maqoli)
18. Molim – jonimning sadaqasi, jonim – orimning sadaqasi. (Qozoq maqoli)
19. Muammoni pul bilan hal qilish mumkin boʻlsa, bu muammo emas, chiqimdir. (Yahudiy maqoli)
20. Oʻgay ona oʻpganidan oʻz onang urgani yaxshi. (Alban maqoli)
21. Olov doʻmbira emas, lekin ustida turib qolsang, raqs tushishni boshlaysan. (Afgʻon maqoli)
22. Onang oʻlgach, otang togʻaga aylanadi. (Telugu maqoli)
23. Oʻrmon yonsa, hamma koʻradi, koʻngildagi yongʻin hech kimga koʻrinmaydi. (Bengal maqoli)
24. Otasi zirk yeydi, bolalarning tishi qamashadi. (Avar maqoli)
25. Oʻtin yorgan ham, “oʻh” degan ham teng ulush oldi. (Bolqor maqoli)
26. Oʻzini uxlaganga solgan odamni uygʻotish qiyin. (Filippin maqoli)
27. Pivoxoʻr tarvuzga oʻxshaydi – qorni kattalashadi, bandi quriydi. (Chex maqoli)
28. Qon qussang: “Qizil sharbat ichgandim”, degin. (Turk maqoli)
29. Qovoqxonachi alkashni yaxshi koʻradi, lekin unga qizini bermaydi. (Belorus maqoli)
30. Sababi nimaligini bilmayman, lekin gʻozlar yalangoyoq yuradi. (Niderland maqoli)
31. Shunday kambagʻallar bor – ularning faqatgina puli boʻladi xolos. (Island maqoli)
32. Siz mening suv ichishimni koʻrib turibsiz, chanqogʻimni emas. (Meksikan maqoli)
33. Siz shamolga buyruq bera olmaysiz, lekin shamol tegirmoni qurishingiz mumkin. (Niderland maqoli)
34. Sovchi kelgan payt itga ham mis ityaloqda ovqat berishadi. (Chechen maqoli)
35. Suv borligida baliq chumolilarni yedi, suv qurigach, chumolilar – baliqni. (Tay maqoli)
36. Suvning yerga singib oqqanidan qoʻrq, yigitning yerga boqqanidan qoʻrq. (Qoraqalpoq maqoli)
37. Tajriba – kal boʻlib qolgandan keyin qoʻlga kiritgan tarogʻimizdir. (Xitoy maqoli)
38. Teshik bor joyda shamol boʻladi, bekorchi bor joyda – gʻiybat. (Boshqird maqoli)
39. Toshbaqa mingta tuxum qoʻyadi – hech kim bilmaydi, tovuq bir dona tugʻsa – butun mamlakatga shovqin soladi. (Indonez maqoli)
40. Toʻydan bir yil oʻtgach – er gapiradi, xotin eshitadi; ikki yil oʻtgach – xotin gapiradi, er eshitadi; olti yildan keyin – ikkoviyam gapiradi, qoʻshnilar eshitadi. (Bolgar maqoli)
41. Toʻydan oldin koʻzingni kattaroq och, toʻydan keyin esa yum. (Irland maqoli)
42. Xonning qoʻynida qaltirab yotguncha qulning qoʻynida quturib yot. (Qirgʻiz maqoli)
43. Xotinni erkak emas, or-nomus qoʻriqlaydi. (Turk maqoli)
44. Yaxshi erkakning ichida oltin egarli ot yotadi, yaxshi ayolning ichida oltin beshikli oʻgʻil yotadi. (Qozoq maqoli)
45. Yaxshi ish jazosiz qolmaydi. (Venger maqoli)
46. Yechilgan jumboq oson tuyuladi. (Fors maqoli)
47. Yomon bola ortiqcha barmoqqa oʻxshaydi: kessang – ogʻriydi, kesmasang – qiynaydi. (Qoʻmiq maqoli)
48. Yukni sen koʻtar, mayli, men oʻrningga harsillab turaman. (Moʻgʻul maqoli)
49. Yurakdan aytilgan soʻz uch qish isitadi. (Udmurt maqoli)
50. Yuz chaqirim yoʻl bosishi kerak boʻlgan odamga toʻqson chaqirim – yoʻlning yarmidir. (Yapon maqoli)

 

Orif Tolib
tarjimalari