“Unniqmoq” nima degani?

Shu soʻz koʻp xato yoziladi va yanglish maʼnoda qoʻllanadi. Hatto koʻzga koʻringan adiblarning asarlarida ham bunga guvoh boʻlish mumkin.

 

Unniqmoq soʻzi boʻgʻiq qora tusga kirishni anglatadi:

 

– Uni oʻylayverib, oriqlab, unniqib ketdim… – dedi Ahmadjon.

A. Muxtor, “Davr mening taqdirimda”.

 

Asqar polvon qorayib unniqqan edi.

Oybek, “Quyosh qoraymas”.

 

Solining figʻoni osmonga chiqdi. Bir-ikki soat ichida uning qora yuzi battar unniqib ketdi.

Y. Shukurov, “Uch savol”.

 

Koʻpincha bu soʻz uniqmoq shaklida va rangi oqarmoq, rangi xiralashmoq maʼnosida ishlatiladi. Lekin bu – xato. Chunki uniqmoq soʻzi na izohli lugʻatga, na imlo lugʻatlariga kirgan. Bu – unniqmoq soʻzini yozish va qoʻllashdagi adashish xolos.