“Ohori toʻkildi”: ohor nima?

Ohor soʻzi fors tilidan olingan. Oʻzbek tilida uch xil maʼnoda ishlatiladi:

 

1️⃣ Ip, gazlama yoki kiyimga pardoz berish yoki qotirish uchun ishlatiladigan modda; kraxmal.

2️⃣ Shunday modda bilan yangi narsaga, kiyimga berilgan ishlov, pardoz.

3️⃣ Koʻchma maʼnoda: obroʻ, hurmat.

 

Ohor soʻzi qatnashgan bir nechta ibora bor:

 

Ohor bermoq – ohorlab pardoz bermoq, kraxmallamoq: chit toʻqilgach, unga ohor beriladi.

Ohori ketgan (yoki toʻkilgan) yoki ohordan tushgan – kiyilgan, tutilgan, eski: ohori ketgan doʻppi.

Ohori toʻkilmagan yoki ohordan tushmagan – 1) yangi, pardozi ketmagan, koʻp ishlatilmagan: ohori toʻkilmagan beqasam toʻn, ohordan tushmagan kamar. 2) koʻchma maʼnoda: obroʻsi ketmagan, hurmati saqlangan, baobroʻ; 3) koʻchma maʼnoda: ilgari ishlatilmagan, tutilmagan, yangi: ohori toʻkilmagan gap.

Ohorini toʻkmoq – 1) yangi narsani kiyib, tutib eskirtmoq, pardozdan tushirmoq; 2) koʻchma maʼnoda: obroʻsini toʻkmoq, behurmat qilmoq.

 

Eʼtibor bergan boʻlsangiz, yuqoridagi iboralarda ohor soʻzi baʼzan kraxmal maʼnosini anglatgan boʻlsa, baʼzida bu maʼnodan ancha uzoqlashgan.

 

📌 Demak:

 

Ohor, ohori toʻkildi, ohori ketdi, ohor berdi ✅

Oxor, oxori toʻkildi, oxori ketdi, oxor berdi ❌  

 

Orif Tolib