Oshiq oʻyin
Bu qiz bilan sevishmoq oson,
Sutdek darrov pishar savdoying.
Goʻyo unga oshiq boʻlasan,
U ham boʻlar goʻyo adoying.
Silab-siypab, siylab suyasan
Kukuvlashgan musichalardek.
Sevgidan ham lekin toʻyasan,
Jonga tegar bir kun yaqinlik.
Nuqta qoʻysang bariga shu payt,
Qutulvolsang – omading kuldi.
Feʼling aynib uch kunlik sutday,
Chindan sevib qolmasang boʻldi.
Orif Tolib
2011
Muallif haqida
Orif Tolib – bir necha kitoblar, ilmiy, badiiy va publitsistik maqolalar muallifi, muharrir, tilshunos. Daryo.uz nashri kolumnisti. “Ibrat farzandlari” loyihasining oʻzbek tilidan savodxonlik darslari ustozi. Oʻzbekiston yozuvchilar uyushmasi aʼzosi.
