Shamol va sinonimlari

Shamol arabchadan olingan, asliyatda shimoliy shamol, sovuq shamol maʼnolarini anglatadi. Oʻzbek tilida havo harakatini, tabiat hodisasini bildiradi. Sinonimlar orasida bosh soʻz shu, asosan undan foydalaniladi.

 

Shabada forschadan. Kechasi, kechqurun maʼnolarini anglatadigan shab va shamol maʼnosidagi bod soʻzlaridan yasalgan, asliyatda kechki yoqimli shamol maʼnosini anglatadi. Oʻzbekchada yengil, mayin shamol maʼnosida qoʻllanadi.

 

Yel – turkiycha soʻz, yelmoq, yelkan soʻzlari shu oʻzakdan.

 

Nasim arabchadan, asliyatda mayin shabada, sabo maʼnosida qoʻllanadi. Oʻzbekchada ham yengil, yoqimli shamol maʼnosini beradi.

 

Sabo arabchada sharqiy shamol va yoshlik maʼnolarini anglatadi. Oʻzbekchada ertalabki mayin, yoqimli shabadani bildiradi.

 

Bod forschada havo oqimi, shamol maʼnolariga ega. Oʻzbekchada ham shamol, yel maʼnosida. Kitobiy tilda qoʻllanadi.

 

Orif Tolib