Suvsiz sahrolarday…

Suvsiz sahrolarday oʻrtanar jonim,

Koʻnglim tashna boʻlib, yonib sevaman.

Sevgiga ishonib, baxtga ishonib,

Mayda tuygʻulardan tonib sevaman.

 

Sen-chi, sogʻintirib qiynaysan atay,

Men esa alamim sheʼrdan olaman.

Dardimni boʻlishmay, hech kimga aytmay,

Kuygan dil zorini kuyga solaman.

 

Oʻzing ayt, dard bormi bundan ziyoda –

Tilsiz baliqlarday soʻzsiz oh ursam.

Sen bahorday yashnab yurgan dunyoda

Hijronga qofiya izlab oʻtirsam!..

 

Asli odat emas menga shoirlik,

Barin unutaman sen kelganing choq.

Bilsang, malol kelar ortiqcha yukdek

Oshiqlikni qoʻyib shoirlik qilmoq.

 

Orif Tolib

 

2009