Toshlar

Bir kuni bir odam ulgurji bozordan ikki qop sabzi-piyoz sotib oldi. Biroq uyga kelib hafsalasi pir boʻldi: sabzavotlar orasidan bir toʻp tosh ham chiqdi! Savdogarlar chuv tushiribdi. Lekin u qaytib borib janjal koʻtarmadi, indamay qoʻyaverdi.

Oradan qirq yil oʻtdi. Bir kuni uning darvozasini ikki munkillagan chol taqillatib keldi.

– Assalomu alaykum, – deb gap boshladi ular. – Biz seni bir zamonlar aldagan edik, kechirim soʻragani keldik.

Ularning hikoyasini eshitgan kishi ularni quchoqladi va:

– Ha, u voqea esimda. Lekin men sizlarni oʻshandayoq kechirganman. Toshlarni esa chuqurga tashlab yuborganman, – dedi.

– Biz esa ularni qirq yil yuragimizda olib yurdik, – dedi sobiq savdogarlar va birdan yengil tortishdi.

 

Orif Tolib

tarjimasi

 

“Irfon” taqvimi (2015-yil 1-chorak)da chop etilgan.