Uchrashuv

Biz uchrashdik, yoʻq, bizlar emas,

Yolgʻon bilmas koʻzlar uchrashdi.

Chaqmoq chaqib oʻtdi bir nafas,

Kul qoplagan hislar uchrashdi.

 

Ikkimiz ham tobora yolgʻiz

Odam toʻla bu tor bekatda.

Sen – beparvo, qaraysan tez-tez

Qoʻlingdagi pushti soatga.

 

Men oʻylayman: yoʻqmi xotirot

Bu qizning tosh yuraklarida?!

Barin koʻmib yuborgan nahot

Dorilfunun yoʻlaklariga?!

 

Biroq men ham befarqman goʻyo,

Unutganday tutib oʻzimni,

Iztirobim sezmagin deya

Yashiraman sendan koʻzimni.

 

Soʻng birinchi kelib toʻxtagan

Avtobusga chiqaman shoshib.

Ketay deyman koʻksimga tikan

Sanchayotgan hislardan qochib.

 

Bir oʻy qiynar: menga bir zamon

Baxtlar bergan bunday uchrashuv

Nahot endi yogʻdirar armon,

Nahot endi ulashar qaygʻu?!

 

Orif Tolib

 

2011