Nur-Sultonmi yoki Nursulton?

Qozogʻiston poytaxti Ostona shahrining nomi 2019-yili oʻzgartirilib, birinchi prezident Nursulton Nazarboyev sharafiga Nursulton deb qayta nomlandi.

Shahar nomi kishi otidan olinganini va u oʻzbek tilida bitta soʻz shaklida yozilishini hisobga olsak, soʻzni Nursulton shaklida yozish toʻgʻri. Qoʻshma va juft soʻzlardan tashkil topgan joy nomlarini chiziqcha bilan yozish rus tiliga xos.

Menimcha, qozoq orfografiyasi ham rus tilidagi ana shu qoidani olgan. Chunki qozoqchada ham shahar nomi chiziqcha bilan yozilar ekan. Qizigʻi, Nursulton soʻzi ism sifatida rus tilida ham, qozoq tilida ham qoʻshib yoziladi.

Oʻzbek tili imlosiga koʻra, ikki soʻzdan iborat joy nomlari chiziqcha bilan yozilmaydi: Yangihayot, Xonobod, Hoshimdasht, Quyi Chirchiq, Qurbon Qashqar, Yangi Margʻilon.

Qozoq tili turkiy tillarga mansubligi va oʻzbekchaga qondoshligi sababli qozoqcha soʻzlarning maʼnosini koʻpincha oson tushunamiz. Nursulton soʻzi asli arabcha nur va sulton soʻzlaridan. Har ikki soʻz oʻzbek tilida ham ishlatiladi. Imlo qoidalariga koʻra, ikkinchi qismi turdosh ot boʻlgan joy nomlari qoʻshib yoziladi. Toponim tarkibidagi nur ham, sulton ham turdosh ot.

Xullas, Qozogʻiston poytaxti nomini chiziqcha bilan yozish uchun sabab yoʻq.

 

📌 Demak:

Nursulton ✅

Nur-Sulton, Nur-sulton ❌

 

Orif Tolib