“Ulkan bir kitobga oʻxshaydi dunyo…”
Rasul HAMZATOV
Ulkan bir kitobga oʻxshaydi dunyo,
Unga qadam qoʻygan har bitta odam
Yozmogʻi kerakdir dildan, beriyo
Hamma-hammasini qadam-baqadam.
Bu dunyo misoli katta bir oʻchoq:
Ajdodlari kabi har bitta erkak
Unga oʻtin qalab ozroq yo koʻproq,
Yonib turgan oʻtni asrashi kerak.
Qoʻlimda qattiqroq siqilar qalam,
Yuragimga esa umid toʻladi:
Hayot kitobida bitta boʻlsa ham
Halol va samimiy satrim qoladi.
Oy – chirogʻi yoniq dunyoga faqat
Yogʻilsin mehr va muhabbat nuri.
Bu koʻhna oʻchoqqa qoʻshsin harorat
Mening bitiklarim – qalbimning qoʻri.
Rus tilidan
Orif Tolib
tarjimasi
Muallif haqida
Orif Tolib – bir necha kitoblar, ilmiy, badiiy va publitsistik maqolalar muallifi, muharrir, tilshunos. Daryo.uz nashri kolumnisti. “Ibrat farzandlari” loyihasining oʻzbek tilidan savodxonlik darslari ustozi. Oʻzbekiston yozuvchilar uyushmasi aʼzosi.
