“Lom-mim demaslik” nima degani?
Tilimizda lom va mim soʻzlari qatnashgan iboralar bor. Bu soʻzlar arabcha ل (lom) va م (mim) harflarining nomini bildiradi.
Lom demaslik iborasi hech narsa demaslik, indamaslikni anglatadi:
Ishning yengil koʻchishiga sevingan ona Otabekning bu shartiga lom demasdan koʻndi.
A. Qodiriy, “Oʻtgan kunlar”.
Lom deya olmay qolmoq esa javob qaytara olmay, gapirolmay, indamay qolishdir:
Doʻstining eʼtirozlaridan soʻng lom deya olmay qoldi.
Lom-mim demaslik iborasi lom demaslik iborasi bilan bir xil maʼnoga ega:
Mudarris domla ham mening ketishimga lom-mim demay rozi boʻlibdilar.
M. Muhammadjonov, “Turmush urinishlari”.
Baʼzida lom-mim soʻzi lom-lim shaklida xato ishlatiladi. Bu – ogʻzaki nutqdagi tovush oʻzgarishi, soʻzni bu shaklda qoʻllamaslik kerak.
Muallif haqida
Orif Tolib – bir necha kitoblar, ilmiy, badiiy va publitsistik maqolalar muallifi, muharrir, tilshunos. Daryo.uz nashri kolumnisti. “Ibrat farzandlari” loyihasining oʻzbek tilidan savodxonlik darslari ustozi. Oʻzbekiston yozuvchilar uyushmasi aʼzosi.
